La Galaxy përgatit ofertë për Ronaldinhon

La Galaxy përgatit ofertë për Ronaldinhon
Klubi amerikan, Los Angeles Galaxy, është duke përgatitur një ofertë të majme për superyllin brazilian Ronaldinho, i cili kështu mund t’i bashkohet yllit anglez të futbollit, David Beckham.
Drejtuesit e LA Galaxy pritet që në ditët në vijim të takohen me agjentin dhe vëllain e brazilianit, Roberto De Asis.

Ronaldinho ende nuk ka vendosur se ku do ta vazhdojë karrierën e tij. Milani dhe Chelsea prijnë në garë për të marrë shërbimet e tij, ndërsa në transferimin e tij ngulmon edhe Manchester City.

Tash, në garë për ish-lojtarin më të mirë të botës futet edhe Galaxy, që përgatit një mega-ofertë e cila vështirë se mund të refuzohet. Drejtuesit e klubit amerikan do t’i ofrojnë pagë prej 18 milionë eurosh në vit, me kontratë prej tre deri në pesë vjet.

Transferimi i Ronaldinhos në LA Galaxy nuk do të duhej të ishte problem për shumën e dëmshpërblimit të cilën e kërkon Barcelona, që arrin shifrën e 30 milionë eurove.